هاى يا طنط هبة أنا شيماء وعندى اتناشر سنة,أنا مشكلتى ان مامتى بتشتغل وساعات بتتأخر فى الشغل وأنا معايا مفتاح البيت ولما بارجع مالاقيهاش باقعد لوحدى فى البيت انا واخويا اللى اصغر منى.لكن هو دايما بيتشاقى ويطلب حاجات كتير وانا معرفش اعملها له ويعيط ويزن وانا باتضايق وباحس انى مش عاوزة مامتى تروح الشغل وتسيبنا كده,مش عارفة اعمل ايه

الرد

اهلا يا شيماء أنا حاسة بيكى ومقدرة ان مسؤولية اخوكى جايز تكون كبيرة شوية عليكى لكن ده مش معناه ان ماما تسيب شغلها كل انسان لازم يشتغل ويكون له اهمية فى المجتمع انتى دلوقتى كبيرة واكيد فاهمة قصدى يعنى انتى مثلا اكيد ليكى طموح نفسك تحققيه يعنى مثلا نفسك تبقى مدرسة او صحفية او طبيبة او رسامة لان ربنا ادى لكل واحد فينا مواهب وقدرات لازم ينميها ويستغلها عشان يفيد غيره ويفيد نفسه واكيد ماما مش مقصرة معاكو فى حاجة ولولا انها عارفة انك كبرتى وانها تقدر تعتمد عليكى ماكنتش ادتك مفتاح الشقة واطمنت على اخوكى وهو معاكى .يعنى لازم تكونى فخورة بنفسك وبثقة مامتك فيكى وتحاولى لما تيجى تقوليلها على المشاكل اللى اخوكى بيعملها وهى تقدر تتصرف معاه وتقولك تتصرفى معاه ازاى.وان شاء الله ماتضايقيش تانى